Pignoletto&Cultura

La Vecia Sizant

L’é bél vadder par Zòla
tanti vettur di bi temp andé
che, con la ròmba di mutur,
i rimpessn al nòstri stré.

J’èn tòtti in bèla mòstra,
j’apeten la partànza dal “laven”.
Mario e la Pina is afairmen davanti
a una sizant ch’la pèr nova nuvànta.
“T’arcordet Pina, quand a la cumprè int’al ssanta?”

“Vut ch’an m’arcòrda Mario ?..A j’eren bèle mrus,
a se steven par spusèr!
E tè t’passes un dopp mezzdè
di “pagarò” a firmèr!”

Po’ al viazz ed nozz, Ròmma e Fiurànza…
So par la Futa…zuvn’ e feliz…
Int’al còr tanta speranza!

Incantè int’i su arcord, la man d’Mario
la lèssa la carrozerì…
Po’, a l’impruvvis, un vérs…
“Mo sé…Pina l’è lì !...

Al culòur l’è quast…t’arcordet Pina?
Anch la tapezzerì l’è quasta què!”
“ Mo andàn Mario..brisa svarslèr,
chissà d’prezisi quanti aj n’è stè!”

“ Famm lezzer la tèrga, a l’ho anch in mant…
Mo sé…mo sé, l’è li…La fineva par dusànt !
E po’…anch al stmèn d’ Pininfarina che par tirèrum so
am regalè tò surèla…la Cristina !”

Intant ch’a la guardèva
Una lòzzla la fazza a gl’immujèva.
La dsè la Pina : “ Mario ed chi srèla adess ?”

Lò stèva pr’arspànder: “ch’sa vutt ch’a sèva!”…
quand al vadd un òmen d’la so etè ch’al s’avsinèva…
l’averra al spurtèl, tira fòra un strazzulein…
e..con bòna manirenna al lòstra al spciatt…spàlvra al fnistren.

A Mario avanza in gàula un : “ L’era la mì ! “
Mo ch l’omen: al sèlta sò, al mett in moto e s’in và vì.

Come du mammalocch,
con attauren tanta zànt ch’la fa dal plòcc…
j’avanzèn come du insmè
a guardàr la sizant che l’ è partè.


D’istent, Mario con la man, accenna un “Ciao”
“Chissà sl’as arcòrda ed nò ancha lì ?”
Al tòl satt braz la Pina e al dis:
“Dai vciatta…l’è mej ch’andagna vì …”

Alessandro Mandrioli - 21 giugno 2013

Ode al Pignoletto - di Alessandro Mandrioli

ODE AL PIGNOLETTO   (Raid del Pignoletto - 23 giugno 2013)

Zirudèla a sain què tott,
zuven, vicc, bi e …forsi anch bròtt,
par fàr fésta, è presto detto,
a ch’al vein ch’l’è al Pignoletto.

Pr’el strà d’Zola i sein ardotti,
veci macchin, bèli e brotti !
Fiat, Lancia, Lamborghini e Maserati!
Dolce, il suono dei motori dagli autisti pilotati!

E…via…via…i partessn’ ed gran vulà
Pr’el stradleini e pr’el cullein ch’j’ein l’argoj ed sta zittà.
Da Gaggioli, al Monticino, par psèir vèdder bain d’avsein
Indovv l’è ch’as fa ste vein !
Pignoletto ! Dio che vein !
Frut d’la téra ed st’el cullein.
Fràsch e sècch, con n’udour ch’al sa un po’ d’peira,
con un gost ch’l’è pein e sòtt !
Che spettaquel..col parsòtt!


Plinio il Vecchio (tant’ann fa) PINO LIETO  al le battzè,
e ste nomm, passè di secol…Pignoletto l’è dvintà.
Col parsott, al pèss, al doulz…o par bèvvr in cumpagnì
un bicchir ed ste bòn vein ed sicuro al mètt allgri.

Tott insèmm,què, incù, al “Pertini”
zuven, vicc, donne e bambini
par fàr fèsta, quast as sa,
a ste vein ch’l’è dègn d’un Rà.

Un applauso, inevitabil,
a ch’el cughi insuperabil
ch’i s’han fatt incu sguazzàr,
cusinand con maestria tanta roba da magnàr!

Un  Evviva da tott quant

al và al noster presidaint,
ch’l’urganezza  sti bi qui
par stàr tott in allegrì!

So…tott quant livan i caliz
Par brindàr tott quant insamm
A una vetta longa e bèla…
TOCH E DAJ LA ZIRUDELA !

Alessandro Mandrioli


 

Centro700

Questo sito utilizza la tecnologia dei cookies e tecnologie simili. Proseguendo con la navigazione ne accetti l'utilizzo. cosa sono i cookies?